Иргэд даатгуулагчдад нийгмийн даатгалын хууль эрх зүйн болоод бүтээгдэхүүн үйлчилгээний талаар ойлголт өгч, мэдээлэл хүргэх ажилд хэвлэл мэдээллийн байгууллага, тэр дундаа сэтгүүлчдийн оролцоо чухал байдаг. Энэ утгаар нь нийгмийн даатгалын байгууллагаас сэтгүүлчдэд зориулсан тусгай сургалтыг уламжлал болгон зохион байгуулж, шинэ тутам батлагдсан хууль, журам, үйлчилгээний талаар мэдээлэл өгч хэвшсэн билээ. Ээлжит сургалтыг Нийгмийн даатгалын ерөнхий газрын дэргэдэх Эрүүл мэндийн даатгалын газар болон Азийн хөгжлийн банкны “Эрүүл мэндийн даатгалын тогтолцоог бэхжүүлэх нь” төсөл хамтран 2016 оны 01 дүгээр сарын 20-ны өдөр амжилттай зохион байгууллаа.
Сургалтанд Нийгмийн даатгалын ерөнхий газрын даргын үүргийг түр орлон гүйцэтгэгч Д.Мэндбаяр, Эрүүл мэндийн даатгалын газрын дарга Р.Наранчимэг, Нийгмийн даатгалын бодлогын хэрэгжилтийг зохицуулах газрын дарга Б.Батбаатар, “Эрүүл мэндийн даатгалын тогтолцоог бэхжүүлэх нь” төслийн зохицуулагч С.Сонин болон холбогдох албаны хүмүүс, өдөр тутмын сонин, сэтгүүл, вэб сайт, телевизийн төлөөлөл 35 сэтгүүлч оролцсон.
Сургалтаар Нийгмийн даатгалын ерөнхий ойлголт, нийгмийн даатгалын багц хуульд орсон нэмэлт өөрчлөлт, нийгмийн даатгалын цахим үйлчилгээ, хилийн чанадааас цахимаар даатгуулах үйлчилгээ, Эдийн засгийн ил тод байдлыг дэмжих тухай хуулийн хэрэгжилт, Эрүүл мэндийн даатгалын тухай хууль /шинэчилсэн найруулга/, Эрүүл мэндийн даатгалын үндсэн ойлголт, зураглал, үйл ажиллагааны тойм, “Эрүүл мэндийн даатгалын тогтолцоог бэхжүүлэх нь” төслийн хүрээнд зохион байгуулж байгаа үйл ажиллагаа, даатгуулагчийн сэтгэл ханамжийн судалгаа, нийгмийн маркетингийн судалгааны үр дүн зэрэг сэдвийн хүрээнд мэдээлэл өгсөн ба бусад сэдвээр сэтгүүлчдийн сонирхсон асуултанд хариулт өгч, хэлэлцүүлэг өрнүүллээ.
“Цаг хугацаа давчуу нөхцөлд, олон сэдвийн хүрээнд мэдээ мэдээлэл хүргэх үед тухайн салбарын талаарх мэдлэг дутах, ойлголтын зөрүү үүсэх зэргээс үүдэн мэдээ, нийтлэл бичихэд хүндрэл гардаг, иймд энэ мэтчилэн мэргэшүүлэх сургалтыг тогтмол зохион байгуулбал иргэдэд хэрэгтэй бөгөөд үнэн зөв мэдээллийг өгөхөд ихээхэн дэмжлэг болно” гэж үзэж буйгаа сургалтанд оролцогчид илэрхийлж байлаа.
