Бүгд найрамдах нэгдсэн Танзани улсын Эрдэс баялаг эрчим хүчний яамны төлөөлөгчид болон Бүгд найрамдах Зимбабве улсын эдийн засгийн хөгжлийн хүрээлэнгийн төлөөллийг багтаасан 20 хүний бүрэлдэхүүнтэй баг өнөөдөр /2015.08.18/ Засгийн газрын хэрэгжүүлэгч агентлаг Нийгмийн даатгалын ерөнхий газарт хүрэлцэн ирж, туршлага судлав.
Тус айлчлалын баг Монгол улсад уул уурхай ямар түвшинд хөгжиж байгаа болон бичил уурхай эрхлэгчидээ хэрхэн зохицуулж ирсэн талаар туршлага судлах зорилготой ба энэ сарын 16-21-ний өдрүүдэд манай улсын холбогдох газруудаар явж танилцан, туршлага судлах аж. Тэдгээрийн нэгт Нийгмийн даатгалын ерөнхий газар багтсан ба бичил уурхай эрхлэгчдийн нийгмийн хамгаалал, тэднийг нийгмийн даатгалд хэрхэн даатгаж буй талаар сонирхож байлаа.
Уулзалтын үеэр төлөөлөгчдөд Нийгмийн даатгалын бодлогын хэрэгжилтийг зохицуулах газрын ахлах мэргэжилтэн Ж.Батжаргал Монгол улсын нийгмийн даатгалын тогтолцооны талаар ерөнхий мэдээлэл өгсөн бол Сургалт сурталчилгаа олон нийттэй харилцах албаны дарга Д.Эрдэнэбат бичил уурхай эрхлэгчдийн даатгалд хамрагдалтын байдлын талаар мэдээлэл өгөв.
Манай улсын 19 аймгийн 150 гаруй суманд нүүрс, алт, жонш, гянтболд, жонш, элс хайрга, гөлтгөнө, давс, цагаан шүр зэргийг гар аргаар олборлодог 150 мянга орчим иргэн байдгаас албан ёсны бүртгэлтэй бичил уурхай эрхлэгч 8000 гаруй байдаг байна. Тэдгээрийг даатгалд хамруулж үүсч болох гэнэтийн эрсэдлээс хамгаалах, нийгмийн хамгааллыг нь бэхжүүлэх чиглэлээр 2012 оноос Швейцарын хөгжлийн агентлагтай хамтран ажиллах болсон юм.
Бичил уурхай эрхлэгчидийн нөхөрлөл болгон дээр, уурхайн ам бүр дээр очиж идэвхтэй сургалт зохион байгуулснаар тухайн онд даатгалд хамрагдсан бичил уурхай эрхлэгчдийн тоо 4800 байснаа 2014 онд 7952 болж өссөн талаар энэ үеэр дурдсан.
Бүгд найрамдах нэгдсэн Танзани улсын төлөөлөгчид бичил уурхайчдынхаа нийгмийн хамгааллыг хангах чиглэлд Монгол улсын туршлагаас авч хэрэгжүүлэх зүйл олон байгааг дурдаад “Танзани улсын хувьд 25 аймаг даяар тархсан 1 сая гаруй бичил уурхайчинтай, тэдний дийлэнх нь даатгалд хамрагдаагүй байдалтай байгаа нь санаа зовоосон асуудал болоод байгаа бөгөөд энэ удаагийн айлчлал ч дээрх асуудлыг шийдвэрлэхийн тулд авч хэрэгжүүлж буй арга хэмжээний нэг” гэдгийг хэлсэн юм.
